Problemado sa ECC Permit
Bicol Mail, August 5, 2010
“Maagi pa sa labot nin dagom” kun ipapadagos an implementacion kan proyecto asin an pinal na madecicion iyo si Presidente Benigno Aquino III, sabi ni Abogado Ricky Tomotorgo, encargado kan Bicol River Basin Watershed Management Project (BRBWMP). An proyecto sa patubig saro sa nasa supervicion kan agencia na dating pinupogolan ni Presidential Assistant for Bicol Affairs Tomasito Monzon, na co-terminus an puesto ni dating Presidente Gloria Macapagal-Arroyo.
“Balik naman sa uno” an pag-proceso kan ducomentos sa Environmental Compliance Certificate (ECC), matapos irecomendar kan Task Force LCD na pundohon an construccion kan dam, segun pa ki Tomotorgo.
Si Gobernador Joey Salceda kan Albay asin chairman kan Regional Development Council (RDC) nagcrear nin Task Force Libmanan Cabusao Dam Project asin ini pinamamayohan kan DENR asin compuesto nin manlaen-laen na agencias de gobierno. An saindang findings suspendiron an construccion sagcod na dai pa nacocompleto an mga rekisitos sa ECC clearance.
Afuera pa kaini, an mga residentes kan Sipocot asin Lupi padagos na nagcocontra huli sa peligro sa tubig baha.
Sinabi pa ni Tomotorgo na sinda nagvisita sa duwang banwaan kan nakaaging semana, alagad dai man nangangahulogan na liwat naman na masikad an construccion envez balik naman sa ginigibong consultacion.
Kan nagpoon an construccion kan dam igwa na nin ECC kaya ngani si pig-isyu kan DENR kaidto an condicion asin yaon sa colatilia na pig-presentar na mayong irerelocate na mga familia, asin dai magkakaigwa nin diversion channel kaya na-aprovaran an ECC kan NIA.
Sa pag-aadal kan DPWH an gigibohon na diversion channel dai puedi ta dakul na bukid an ma-aafectaran na dakul pa an danyos sa kapalibotan asin mas dakula pa an gagastoson na fondo kan gobierno.
Pigpaliwanag kan encargado kan BRBWMP sinda nag-isip nin bagong paagi asin an decicion ninda asin iba pang agencia irelocate nalang an maafectaran na familia asin nagkaigwa na nin bagong plano, huli kaini igwa nang pagbalga sa ECC. Sa findings kan RDC dai nagsunod an ECC na pig-isyu kan DENR asin pigconsiderar na pagbabago dapat magbalik liwat sa proceso sa pagkoa kan sinambit na clearance.
Halawig na rekisitos kinakaipuhan maipaliwanag, mapoon naman sa pagconsulta sa man-iba ibang grupo, maatubang naman sa Sanggunian Bayan, yaon si macontrang familia huli ta afectado. Kaya ngani ginigibo an mga consultacion nganing macompli si rekisitos para maseguro na an ECC.
Sa hapot kun madadagos an proyecto, an simbag kan BRBWMP deficil huli ta igwa nang enot na recomendacion an RDC, ika-duwa an DENR nagtao na nin ECC alagad ngonian ma-apply naman, poon naman sa uno sa pag-proceso sagcod sa mga consultacion.
Sa Sipocot, Camarines Sur na kun haen namumugtak sa Brgy. Manangle an dam project, sinabi ni Consejal Manuel Chan na nagtalaan sinda asin an BRBWMP nin panibagong public hearing nganing maaraman kan namamanuaan kun igwa nang bagong desenyo na maseseguro na dai nin peligro sa tubig baha.
Alagad sinabi kan consejal na tindido an residentes asin oficiales local na dapat dai na idagos an construccion kan dam.
Sa Lupi, Camarines Sur tugot na si 86 na familia na afectado kan proyecto mientras na dakul man giraray na residentes an nagcocontra huli sa pighahadit na tubig baha. (Admin's Note: Dai pong kasiguruhan an totoong pagtogot kan 86 na apektadong pamilya.)
An centro kan duwang banwaan fermi nang piglalantopan nin tubig baha kaya nanindugan contra dam.