Press Statement (March 8, 2010)

by Vic Nierva

Kaining mga nakaaging pirang aldaw, kadakol na beses kong nadangog an sakong pangaran sa radyo. Kun bako man na ako an nakadangog, naiheras sako kan mga katood, mga katrabaho, mga estudyante, asin iba pang mga tawong nasa palibot ko. Dai man sorpresa na katakod ini kan adbokasiya ko kontra sa Libmanan-Cabusao Dam (LCD), huli ta an adbokasiyang ini sakong lantad na tinutulod, kaiba an mga pag-aadal asin pagsiyasat tanganing totoo asin makahulugan an adbokasiya bakong kampay sa duros saná.

Alagad, kaining mga nakaaging pirang aldaw, an ngaran ko tinatakod sa mga kaputikan.

Kan Biyernes, Marso 5, 2010, itinakod an ngaran ko sa subuot rally sa Libmanan, Camarines Sur, sarong bagay na nagkawsa tanganing balubagion ako sa media, mantang an pirang entidad man kan media daing pakimàno kun totoo an linuluwas sa ere o dai. Ni dai ngani maghapot man lamang kun totoo an sahot. Huli ta ako, sa ngaran kan LupiKontraDam, mayo nin inoorganisang rally. Minsan kami sa Lupi nagharapot-hapotan kun ano an isyu kan rally na inaapon samo, huli ta sagkod sa panahon na isinusurat ini, mayo kaming imbitasyon na nakukua hali sa kun siisay man na nangengenot sa rally. Sosog sa sakong pagkaaram, an rally sarong asembleya na pinadrinohan kan sarong grupo na inaapod Bayan. Kinontak ninda si Barangay Kapitan Rene Dimaculangan kan Poblacion, Lupi, Camarines Sur, na tabangan sindang maghagad permit. Alagad kun ano o para sa ano man an asembleyang nasambit, dai ako nin pagkasabot.

Kan Sabado, Marso 6, nagluwas sa radyo an intrebista ki Edgar Tapas, sarong paraoma subuot sa Libmanan. Katakod kan isyu kan rally subuot na mayo kami ni ga-alpog na pagkaaram. Nagbutas nin pahayag si Mr. Tapas na ‘madara daa siya nin sundang, ta gigibohon kaming abono.’ Sarong makosog na bantâ na dai man dapat nangyayari asin dai dapat nang ine-ere huli sa sensetibong laman kan pahayag. Alagad sa likod kaini, mayo pa man giraray nagkainteres sa kun ano man an samong masasabi, o kun ano man an masasabi kan samong lado.

Kasuudma, Lunes, Marso 8, nag-aaniningal an sakong ngaran sa ere kan mga istasyon nin radyo sa Naga sa mga sahot na ginagamit ko an sakong mga estudyante sa Ateneo de Naga University sa sakong adbokasiya. Sarong pagkadaradakulang kaputikan! Huli ta sa mga proseso mi sa LupiKontraDam, o sa pansadiri ko man na kalakawan sa adbokasiya, dai ako naggamit nin mga estudyante sa pagkaaram na an saindang buhay tibaad madanyaran. Nagtutukdo ako nin Media Studies sa Ateneo, asin aram ko na nagkakapirang estudyante an interesado sa isyu kan mga taga-Lupi sa dam, igwa saindang mga nagpa-Lupi na asin nagkondusir nin mga pag-aadal duman. Kun sinda hahapoton, naanggutan ko—asin kan iba pang paratukdo—sinda huli ta nagduman sinda na daing paaram asin dai nagsunod sa patakaran kan eskwelahan. Kun igwa man mga estudyanteng naghihiro asin nag-aadal kan mga isyu kan LCD, mga pansadiri ninda ining paghiro, mayo akong kinaaraman sa saindang mga kalakawan. Kun may mga estudyanteng naghahagad nin pagkakataon para sa sarong intrebista, tinatawan sinda nin hustong panahon, siring kan pagtrato ko sa ordinaryong taga-media, huli ta minarani sinda sako sa kapasidad na iyan. Duman sa nagsasabing irereklamo ako sa administrasyon kan Ateneo huli sa mga bagay na ini, sige po, huli ta dayaday na aram ko sa sakong kalag na bako kong kagibohan iyan.

May nagsasabi man na butasan ko na daa an pagtukdo huli ta taliwas ini sa sakong ginigibo sa adbokasiya. Alagad ano an taliwas sa pagiging paratukdo mantang nagtutulod nin sarong kawsa? Bakong sa eskwelahan tinutulod ta an katotoohan, an tama, asin an maninigo? Bakong sa eskwelahan pinapadanay ta an pagiging matarom na kritiko kan mga kalakawan na sa hiling ta lihis sa mga katukduan kan akademya? Huli ta ako nagtutubod na an paratukdo dai sana nagtutukdo kundi nagsasagibo asin naghihiro; huli ta ako nagtutubod na an paratukdo dai puwedeng nagbubuta-butahan sa mga katotoohan kan sosyudad mantang nagtutukdo nin mga teorya asin prinsipyo sa saiyang mga estudyante. Kun siring an paratukdo, dai siya maninigong apodon totoong paratukdo; robot saná siyang nagtoom nin mga leksyon na dapat niyang itukdo.

Sa liwat, boot kong ipasabot sa gabos na an katuyuhan kan LupiKontraDam asin kan gabos na aspekto kan samong adbokasiya bako sanang para sa mga taga-Lupi, kundi para ini sa gabos—para sa mga taga-Cabusao, Libmanan asin Sipocot, asin iba pang banwaan na puwedeng madanyaran kan LCD. Boot mi liwat na ipaabot sa gabos na dai kami kontra sa irigasyon, kundi kontra kami sa dam na maglulubog sa samong banwaan mantang dai man nagtataong kasiguruhan na an mga sinasabing mabebenipisyuhan mapapatubigan. Ini huli ngani ta dai man inadalan na marhay an proyekto, dai man tinawan nin magkakanigong pag-atid-átid, sa likod kan katotoohan na awad-awad na kuwarta an inuulà sa proyektong ini. Agyat asin imbitasyon mi po sa gabos na aramon asin adalan ta gabos an ginigibo kan mga proponents kan LCD tanganing maaraman ta an mga padayà ninda asin panlalansi sa mga tawo. Padanayon ta man logod gabos an totoo.

Mabalos na marhay saindo gabos.