Anti-dam rally sa Abril 14

Press Release

Sipocot, CamSur—Pinagkaoroyonan kan mga namamanwaan na minakontra sa Libmanan-Cabusao Dam an sarong dakulang protesta na ilalansar sa Miyerkules, Abril 14, na gigibohon sa mga banwaan kan Sipocot asin Lupi, Camarines Sur.

Sa pinagsararong puwersa kan mga namamanwaan asin manlaen-laen na organisasyon asin sektor, minukna an Alyansa kan mga Namamanwaan laban sa Dam (AnDam) na iyo an mangengenot sa protesta. An AnDam kinukumpunir nin mga residente kan mga banwaan na Lupi asin Sipocot na biyong nahahandal sa panahon na ipadagos an proyektong dam na tinutubudan na madanyar sa mga nasambit na lugar. Kaibahan man ninda an mga residente kan mga banwaan sa primer distrito kan CamSur asin an manlaen-laen na sektor kan sosyudad na minasuporta sa saindang kawsang tinutulod, kaiba na digdi an mga concerned citizens hali sa Libmanan asin Cabusao na sinasabing manginginabang sa proyekto.

An enot na kabtang kan protesta pupunan alas-9 nin pagkaaga sa paagi kan ‘Martsa Laban sa Dam’ na gigibohon sa kalabaan kan Maharlika Highway sa Sipocot, poon Barangay Impig sagkod Barangay Tara kun sain an mga mamartsa matulak man pasiring sa Poblacion, Lupi.

Sa plasa kan Lupi gigibohon man an ikaduwang kabtang kan protesta na iyo an ‘Aráng-Banwaan: Pagtaas-Tingog Kontra sa Dam’ na sarong matuninong na prayer-rally. Alas-2 nin hapon pupunan an programa sa paagi nin Misa nin Banwaan na susundan naman kan programa nin protesta. An programa pangengenotan nin mga indibidwal na hali sa manlaen-laen na sektor asin banwaan sa CamSur na mapahayag kan saindang labi-labing pagkontra sa proyektong dam na tinutulod kan Bicol River Basin and Watershed Management Project (BRBWMP) asin man kan National Irrigation Administration (NIA) asin suportado man nin Rep. Diosdado ‘Dato’ Arroyo.

An AnDam padagos na higot na minakontra sa 2-Bilyon pisong dam huli sa kawaran nin tamang konsultasyon dapit digdi sa mga apektado asin benipisyaryo kan proyekto; pagkawara nin mga erokan asin pagkaraot nin kabuhayan kan mga paratanom mga namamanwaan; pagkaraot kan kapalibutan asin pag-abot kan mga delikadong pagbaha sa Sipocot asin Lupi; ma-anomalyab asin bakong makataong proseso kan mga nagtutulod digdi; asin kadakol pang mga dahilan na nakakaapekto sa totoong pag-uswag kan banwaan.